Deu 30 | NdeIBE | STEP | Kuzakuthi zonke lezizibusiso lalezi ziqalekiso engilimisele zona sezehlele phezu kwenu beselizigcina ezinhliziyweni zenu kuyo yonke indawo lapho uJehova uNkulunkulu azalichitha khona phakathi kwezizwe,

Deuteronomy 30

Ukuphumelela ngemva kokuphendukela kuJehova

1 Kuzakuthi zonke lezizibusiso lalezi ziqalekiso engilimisele zona sezehlele phezu kwenu beselizigcina ezinhliziyweni zenu kuyo yonke indawo lapho uJehova uNkulunkulu azalichitha khona phakathi kwezizwe, 2 lalapho lina labantwabenu selibuyela kuJehova uNkulunkulu wenu limlalela ngenhliziyo yenu yonke langomphefumulo wenu wonke kusiya njengokulilaya kwami lamuhla, 3 kulapho uJehova uNkulunkulu wenu ezabuyisela ukuphumelela kwenu abe lozwelo kini njalo alibuthe yena lapho alichitha khona ezizweni.

4 Kungaze kube khatshana okunganani ngaphansi kwelanga lapho elizabe lixotshelwe khona, kusukela khonapho uJehova uNkulunkulu wenu uzalithatha libuye ekhaya.

5 Uzalikhokhelela elizweni alinika okhokho benu, lina-ke lizalithatha libe ngelenu. Uzalenza liphumelele njalo lande ukwedlula okhokho benu. 6 UJehova uNkulunkulu wenu uzasoka izinhliziyo zenu kanye lezinhliziyo zezizukulwana zenu, ukuze limthande ngezinhliziyo zenu zonke langomoya wenu wonke, liphile. 7 UJehova uNkulunkulu wenu uzakwehlisela zonke leziziqalekiso phezu kwezitha zenu ezilizondayo lezilihlukuluzayo.

8 Lizaphinda njalo liyilalele iNkosi yenu njalo liyilandele imilayo yayo engilinika yona lamuhla. 9 Ngakho uJehova uNkulunkulu wenu uzaliphumelelisa kakhulu kuyo yonke imisebenzi yezandla zenu njalo alibusise ngenzalo langamazinyane ezifuyo zenu lamabele amasimu enu. UJehova uzathokoza ngani njalo aliphumelelise, njengoba wathokoza ngabokhokho benu, 10 nxa lizalalela uJehova uNkulunkulu wenu ligcine imilayo lezimiso lezo ezabhalwa kule iNcwadi yoMthetho liphendukele kuJehova uNkulunkulu wenu ngenhliziyo yenu yonke langomphefumulo wenu wonke.

Isamukeliso sokuphila loba ukufa

11 Engililaya ngakho lamuhla akunzima kakhulu njalo akukhatshana lani ukuba likufinyelele. 12 Akukho phezulu ezulwini, okungabangela ukuthi libuze lithi: “Ngubani ozakuya ezulwini ayesithathela ukuze akwethule kithi sibe lakho ukukulandela sikwenze na?” 13 Kanti njalo akukho ngaphetsheya kolwandle, okungabangela ukuthi libuze lithi, “Ngubani ozachapha ulwandle ayesithathela ukuze akwethule kithi sibe lakho ukukulandela sikwenze na?”

14 Akunjalo, ilizwi liseduzane lawe kakhulu, lisemlonyeni wakho lasenhliziyweni yakho ukuze ulilalele.

15 Khangelani, ngiletha phambi kwenu lamuhla ukuphila lokuphumelela, ukufa lokubhidlika. 16 Ngakho ngiyalilaya lamuhla ukuthi lithande uJehova uNkulunkulu wenu, lihambe ezindleleni zakhe, kanye lokugcina imilayo yakhe, izimiso lemithetho; ngalokho lizaphila lande, njalo uJehova uNkulunkulu wenu uzalibusisa elizweni eselingena kulo ukuba lilithathe libe ngelenu.

17 Kodwa uba inhliziyo yenu ifulathela lingabe lisalalela ngokuzithoba, njalo lingaholelwa ekuthini likhonze abanye onkulunkulu libe selibakhonza, 18 ngiyalitshela lamuhla ukuthi ngeqiniso lizabhujiswa. Aliyi kuphila isikhathi eside ezweni elizalithatha ekuchapheni kwenu iJodani.

19 Lamuhla nginxusa izulu lomhlaba ukuba ngofakazi bami ukumelana lani ngisithi sengimise phambi kwenu ukuphila loba ukufa, izibusiso leziqalekiso. Khathesi zikhetheleni ukuphila, ukuze kuthi lina kanye labantwabenu libe lokuphila 20 kanye lokuthi limthande uJehova uNkulunkulu wenu, lilalele ilizwi lakhe, libambelele liqine kuye, ngoba uJehova uyikuphila kwenu, njalo nguye ozalinika iminyaka eminengi lihlezi elizweni afunga ukuba uzalinika okhokho benu, u-Abrahama, u-Isaka loJakhobe.